Alasan mengapa ada pomparan Silitonga di Sipahutar

Ia pinompar ni silitonga, marserak do tu angka luat Humbang parhabinsaran, ro di Humbang Padangnasida.

mangihuthon baritana na sian tua2i hubege, adong do dua halak ma marhaha maranggi sian pinompar ni silitonga, margoar Ompu Lamin dohot Guru Hinambangan, maringanan di luat Onanrunggu Humbang. adong do sada ni ompu Lamin margoar Ompu Tuan.

Ia ompu lamin, parumauma do, alai anggo Guru Hinambingan, parjuji do. di na sadari ro ma Guru Hinambingan sian perjujian dipangido ma indahan panganonna sian inana. alai ndang di lehon inana i, didok ma: "Gadong i ma papangani!" Hape dung ro Ompu Lamin sian hauma pintor dilehon inana ma indahan dohot lompan na tabo panganonna. Hinorhon ni i, sogo ma roha ni Guru Hinambingan mida ibana.

Mabiar do Ompu Lamin mida Guru Hinambingan, ala datu do ibana, ninna rohana ma: " Datu do Guru Hinambingan, ia tung rasunonna do ahu?!"

Ndang pola sadia leleng nari, laho ma ibana pinaulubalang tu Hutaginjang na di Hutajulu, laos mangoli ma ibana muse disi; hape ro do nang Guru Hinambingan pinadatu tusi.

Dung manang sadia leleng, gabegabean ma nioli ni Ompu Lamin, alai mate ma ibana andorang so tiur haroan ni niolina i.

Ia dung mate Ompu Lamin, dipagodang Guru Hinambangan ma nioli ni hahana i. Hirahira dua bulan nari, tubutubuan ma boruboru i, baoa. Gabe masiahuahuan ma Guru Hinambingan dohot Ompu Tuan, anak ni Ompu Lamin, tubu ni niolinai parjolo.

"Ahu do nampuna anak," ninna Guru Hinambingan.

Alai didok Ompu tuan ma: "Anak ni damang Ompu Lamin do on. songon dia ma boi tuu gellengmu ai holan dua bulan dope dung dihabia ho!" Gabe sai marbadai ma nasida.

sahat ma parhataan i tu jolo ni angka raja. jadi dung ma sipatorang hatana be nasida, disungkun raja ma boruboru i: "Ia dohononmu, ise do nampuna anak di na tubuhononmon?"

"Anggo dohononku rap nampuna anak do Ompu Lamin dohot Guru Hinambingan, ia rap dongan saripengku do nasida na dua!"

dung i dipaujung raja ma parhataan i: "Ompu Tupa ma goar ni posoposo i. Tupa do dohonon anak ni Ompu Lamin, tupa do dohonon nang anak ni Guru Hinambingan. Asa unang be gulut hamu ala ni." ninna angka raja i. Jadi saut ma songoni.

Alai hansit ma roha ni Ompu Tuan, Gabe bungkas ma ibana, diboan ma inana i tu SIPAHUTAR, unang sai mardomua di rohana boruboru i dohot Guru Hinambingan.

Tu SIPAHUTAR pe, diihuthon Guru Hinambingan do muse, gabe diulahon Ompu Tuan ma anggina naung ginoar ni raja "Ompu Tupa" tu AEKNAULI PANGARIBUAN.